بسم الله الرحمن الرحيم
اخي الغالي قبل لا تفتح الخلية لازم تدخن بهدوء قريب على باب الخليه وبعدين ترفع الغطاء علكيفك وتدخن همين بهدوء ع الاطارات من فوق وكل هذا علمود لا يهيج النحل ويلتهي بأكل العسل وتقل عدائية النحل وحركة ايدك لازم تكون بطيئة مو سريعة من ترفع الاطارات او تسوي اي شيء . والاطارات من تفحص تبدي بيهن من اليسار الى اليمين(هاي الاتجاهات من تكون انت وقف امام باب الخلية ) وعند فحص الخليه لازم تكون واقف خلف الخلية او في احد جوانبها متوكف كدام الخلية . والضرورة من فحص الاطارات مراقبة الخلية شكد بيها حضنه والتاكد من وجود الملكة ( طبعآ هاي تعرفها من وجود الحضنه اذا مشفت الملكة وميزتها) ولازم تلاحظ خوما اكو بيوت ملكية بالخليه والي تكون على شكل مخروطي متجه للاسفل وتكون باسفل الاطارات دائمآ هذني لازم تخربهن طبعآ بعد التأكد من عدم فقدان الملكة الاصلية لان لازم اكو سبب من بناء هاي البيوت لان اذا عفتهن والملكه الاصليه بعدها بالخليه راح يصير عندك تطريد وتخسر من كثافة النحل وقوة الخلية وايضآ من الفحص تشوف الخليه وكثافة النحل اذا متضايق لازم تضيف اساسات اضافيه وتكبر الخليه حسب حاجة الخلية مع الملاحظة عدم الاسراف في اضافة الاساسات لانه يؤثر على اداء الخلية ونشاطها ...

وياريت باقي الأخوة اذا عدهم ملاحظات او أضافات على هذا شرحي أن شاء الله يفيدونا... لك مني أجمل تحية .